శబరిమల అయ్యప్ప స్వామిని దర్శించుకునే భక్తులకు ఆలయ అధికారులు శుభవార్త ప్రకటించారు. భక్తుల సౌలభ్యం కోసం సన్నిధానం వద్ద 18 మెట్లు ఎక్కగానే స్వామి దర్శనం కలిగేలా మార్పులు చేయాలని దేవస్థానం ట్రావెన్ కోర్ దేవస్థానం బోర్డు నిర్ణయించింది. దీని ద్వారా భక్తులకు ఆలయంలో మరింత అనుకూలమైన దర్శన ఏర్పాట్లు కల్పించనున్నారు. ఈ మార్పును ప్రయోగాత్మకంగా అమలు చేయాలని టీడీబీ అధ్యక్షుడు పి. ఎస్. ప్రశాంత్ నిర్ణయించారు.

మార్చి 15 నుంచి 12 రోజుల పాటు ఈ కొత్త విధానాన్ని పరీక్షించనున్నారు. ప్రయోగాత్మకంగా అమలు చేసిన తర్వాత దీనివల్ల భక్తులకు అసౌకర్యం తగ్గుతుందా అనే విషయాన్ని పరిశీలించనున్నారు. ఇది విజయవంతమైతే, రానున్న మండల మకరవిళక్కు సీజన్ నుంచి దీన్ని శాశ్వతంగా అమలు చేయనున్నట్లు ఆలయ నిర్వాహకులు వెల్లడించారు. ఇది శబరిమల యాత్రికులకు మరింత వేగవంతమైన, సౌకర్యవంతమైన అయ్యప్ప స్వామి దర్శనం కల్పించనున్నది.

సాధారణంగా భక్తులను 18 మెట్లు ఎక్కిన వెంటనే.. వారిని ఓ వంతెన మీదుగా మళ్లించి, కొంత సమయం క్యూలో ఉంచిన తర్వాతే భక్తులను దర్శనానికి అనుమతిస్తారు. ఇందువలన భక్తులు కొంత సమయం ఆలయంలోనే నిరీక్షణ చేయాల్సి వస్తుంది. కాగా, కొత్త విధానంలో ఈ జాప్యం తగ్గించడంతోపాటు.. భక్తుల ధర్మానికి అనుగుణంగా దర్శనం మరింత సులభతరం అవుతుంది. ఈ నిర్ణయం భక్తుల కోసం చేసిన మరో పెద్ద సంస్కరణగా మారింది. అయ్యప్ప స్వామిని దర్శించేందుకు వచ్చే యాత్రికులకు సౌకర్యవంతమైన అనుభవం కలిగించడమే దీని ప్రధాన లక్ష్యమని దేవస్థానం స్పష్టం చేసింది. భక్తుల సంఖ్య భారీగా పెరుగుతున్న క్రమంలో దర్శనానికి మరింత సమయం కేటాయించడంతో పాటు, యాత్ర అనుభవాన్ని మెరుగుపరచేలా ఈ మార్పు ఉపయోగప‌డుతుందని టీడీబీ అధికారులు భావిస్తున్నారు.